සගපුර රන්මිණි දොරටු ඇරා

සගපුර රන්මිණි දොරටු ඇරා
ලෝ තුල මංගල සිරි පතුරා
පෙම්බර මෑණී ශ්‍රී සුර දෝනී
තේජස පා වැඩි ඒ
සගපුරටා සැවොම තුටා
වදිමුව ශ්‍රී පාදේ...//

තේජමාන හිරු පරදා සේල ගත පළඳා
පාද මූල තරිඳු යොදා ශ්‍රී පතුරමිනේ
වැඩියේ කුමරී වදිමූ සිතිනි නදා

තාරකාද දොළොස රඳා පේළියකට යොදා
ශෝභමාන කිරුළ සදා ශ්‍රී පතුරමිනේ
වැඩියේ කුමරී වඳිමූ සිතිනි නදා

පාපිදාස රකින ලෙදා ලෝක සතට සදා
වාසනාව දෙවනු සදා ශ්‍රී පතුරමිනේ
වැඩියේ කුමරී වඳිමූ සිතිනි නදා

සාදු ශීල ගුණෙහි බැඳා සෑම පවම බිඳා
දේව මෑණි නමිනි පුදා ශ්‍රී පතුරමිනේ
වැඩියේ කුමරී වඳිමූ සිතිනි නදා

මා මව්නී අති ප්‍රේමනීය

මා මව්නී අති ප්‍රේමනීය
මේ ලෝකේ මගෙ ආධාර
ශෝකෙන් මා නිති සන්තෝෂය
යාච්ඤා වේ මව සුන්දර

මා යාච්ඤා අසනූ දයාවෙන්
මා මව්නී සිට ස්වර්ගයෙන්
ආරක්‍ෂා කරනූ පාපයෙන්
මා මූදා සැම ශෝකයෙන්

අන්ධ වූ අප ආලෝකය
දුර්වල අප ආධාර
පාපී වූ අපගේ පිහිටය
මව් මරී අති පෙම්බර

ජේසුගේ අති ප්‍රේම මව්නී
ලෝ වාසී අප මාතෘනී
පාපෙනා මිදි කන්‍යාවෙනී
වේ දයා මට ප්‍රේමයෙනී

ඊර්ෂ්‍යාදී නෙක පව් දෝසෙනී
මා සිත් දුස්විය හැක්කේ වේ
ඒවායින් ගැලවෙන්ට මව්නී
මා හා සාමය ඇත්තේ වේ

නෙළුම් පිපීලා පෙති විසිරීලා

නෙළුම් පිපීලා පෙති විසිරීලා
ජලය සුවඳ වෙන්නා
මමත් මලක් නම් පිපී සුවඳ දී
ඔබ ලඟ පරවෙන්නා...//

කාන්ති කුමරියෙනී
නාද මිහිරියෙනී
සාන්ත සුසිලියෙනී
දේව දියනියෙනී
සීල සිතුමිණෙනී
රූප සිරිනියෙනී
දම්ම කිරුලෙහි දිසි දිසි බබලන
රමණිය සිළුමිණෙනී

කන්‍ය සිරි ලියෙනී
පුණ්‍ය පිරි ලියෙනී
රම්‍ය ඉසි ලියෙනී
අන්‍ය සම ලියෙනී
සාම රැජිණියෙනී
දේව මෑණියෙනී
සෑම සුවඳැති මල් වනයෙහි පිපි
ලක්සන කුසුමියෙනී

සෑම සිරි සිලියේ
සෝම සුකොමලියේ
මාල මංගලියේ
ගීත අන්ජලියේ
පාද සඳ දිලියේ
දේව රන් දොළියේ
නීල අඹරෙහි තරු පරදන සරු
සිරු'රැති සිරි මලියේ

වචනයේ දාසියයි මරි මවේ

වචනයේ දාසියයි මරි මවේ
සම්මතය හැර දැමූ ලඳ ඔබයි
අසම්මත වූ දේව සැලසුම
වටහා ගත් කන්‍යා

තැනට බලයට දාසියක් නොවී
එසේ සැමගෙන් දෙව්බවින් පිරී
අළුත් මැවිල්ලක කැඩපත වූ
විශ්වයෙ මව අම්මා
අම්මා අම්මා විශ්වයෙ මව අම්මා

කැපවී වැයවී දෙව් කැමැත්ත සොයා
වචනය තෙම වූ සත්‍ය කුස දැරුවා
කඩු හතකින් හද සිදුරු කරන්නට
ඉඩ දුන් ලඳ අම්මා
අම්මා අම්මා ඉඩ දුන් ලඳ අම්මා

මරිමව් විලසින් සුදතුන් මග සොයමු
දෙව් කැමත්තට සැමවිට හිස නමමු
ඔබ ගිය මඟ අප මඟවෙන දවසේ
අපිත් ඔබේ දරුවෝ
අම්මා අම්මා ඔබයි අපේ අම්මා

පසසව් සමිඳුන් උදෙසා මරිමව්

පසසව් සමිඳුන් උදෙසා මරිමව්...//
පසසව් සමිඳුන් උදෙසා මරිමව්...//

උදම් අනමු සැම මුවකින්
පසසමු මරි මව් සමඟින්
ඇගෙ ගුණ සමුදා සිහිකර සැමදා
පසසමු මරිමව් සමඟින්

වළාගැබෙන් ආ මරියා නොව ඔබ
ගමේ හදගැස්ම හඳුනා ගත් ලඳ
කුරුස පාත්‍රය පුතු සමඟින්
පානය කළ මරියා...//
පානය කළ මරියා...//

දූලි මැදින් පිය මැන ජෙරුසලමේ
පාර තනන්නට නව ජෙරුසලමට
පුතුට ඉගැන්වූ පුතු දිරි ගැන්වූ
ඒ ලඳ ඔබ මරියා...//
ඒ ලඳ ඔබ මරියා...//

සුරිඳු ජේසු මෑණියේ

සුරිඳු ජේසු මෑණියේ 
සුහද මව මගේ
පව් කමා වෙ සෙත සදාවෙ
සදා සරණෙ මා...//

මංගල වේ රැජිණෙනී කරුණාබර වූ
මෑණියණී අප පණෙනී අමා මිහිරෙනී
ගැති අපේ පැතුමෙනී 
එකම සතත සහයෙනී 
මංගල වේවා

අනේ එහෙව් වූ අපේ මැදහත්කාරී
කරුණාබර ඔය ඔබෙ නෙත් අප මත රඳවා
සසර මේ ගෙවුණු දා
ඔබෙ කුසෙ ඵල ජේසු වතේ 
දැකුම'පට දෙවා

ජේසු අම්මෙ මේ අහන්න

ජේසු අම්මෙ මේ අහන්න 
ඔබේ දෑතට තුරුළු වෙන්න 
සුදු සළු කොණ අල්ලගන්න 
මට හරි ආසයි...//

ජේසු අම්මෙ මේ අහන්න 
ඔබෙ රසබර බස් අහන්න 
ඔබෙ ඔවදන් පිළිපදින්න 
මට හරි ආසයි...//

ජේසු අම්මේ මේ අහන්න 
ඔබෙ රැකවරණය ලබන්න 
ඔබේ උදව් පතා ඉන්න 
මට හරි ආසයි //

ජේසු අම්මෙ මේ අහන්න 
ඔබෙ අත ගෙන පියමනින්න 
ජේසු ළඟට හෙමින් යන්න 
මට හරි ආසයි...//

ජේසු අම්මෙ මේ අහන්න 
සුර පුර වෙත ළඟා වෙන්න 
සුර සැප මේ යයි දකින්න
මට හරි ආසයි...//